Мақомот гуфтанд, пули ҷоизаҳо, ки аз Фонди захиравии президент ҷудо шудааст ва 1 миллиону 787 ҳазору 500 сомонӣ (қариб 164 ҳазор доллар)-ро ташкил медиҳад, барои қадршиносии 46 нафар ғолибон ва ҷоизадорони мусобиқаҳои байналмилалии варзишӣ ва мураббиёни онҳо ҷудо гардидааст.

Зимнан, ҷоизаи президенти Тоҷикистон соли 2015 таъсис ёфтааст ва бори нӯҳум аст, ки ба ғолибону ҷоизадорони мусобиқаҳои байналмилалӣ ва мураббиёни онҳо супурда мешавад.

То ин давра ба 370 нафар ғолибону ҷоизадорони мусобиқаҳои сатҳи байналмилалӣ аз фонди захиравии президенти Тоҷикистон 8 миллиону 250 ҳазор сомонӣ мукофотпулӣ ҷудо гардида, дар вазъияти тантанавӣ тақдим карда шудааст.

Мутобиқи қарори Ҳукумати Тоҷикистон ба варзишгарон барои медали тиллои Бозиҳои олимпӣ 300 ҳазор сомонӣ, барои медали нуқра 250 ҳазор сомонӣ ва барои медали биринҷӣ 200 ҳазор сомонӣ супурда мешавад.

Дар ин қарор, инчунин, ҳаҷми маблағи мукофотпулӣ ба ғолибону ҷоизадорони мусобиқаҳои қаҳрамонии ҷаҳону Осиё ва Бозиҳои осиёӣ муқаррар шудааст.

Се медали варзишгарони тоҷик дар Бозиҳои XXXIII тобистонаи олимпӣ, ки аз 26-уми июл то 11-уми августи соли 2024 дар шаҳри Пориси Фаронса баргузор шуданд, натиҷаи беҳтарини варзиши тоҷик дар соли 2024 мебошад.

Дар Олимпиадаи Порис-2024 аз 14 варзишгари тоҷик се нафар – Сомон Маҳмадбеков (-81 кг), Темур Раҳимов (+100 кг), ҳарду дар риштаи ҷудо, Давлат Болтаев (-92 кг) дар риштаи бокс - бо медалҳои биринҷӣ сарфароз гаштанд.

Варзишгарони тоҷик соли гузашта дар ду ришта - ҷудо ва гуштии озод - дар қаҳрамонии ҷаҳон пас аз 17 сол медал ба даст оварданд. Сомон Маҳмадбеков дар мусобиқаи қаҳрамонии ҷудои ҷаҳон дар вазни то 81 кило дар шаҳри Абузабии Имороти Муттаҳидаи Арабӣ барандаи медали биринҷӣ гардид.

Бояд зикр намуд, ки ин дуюмин медал дар таърихи ҷудои тоҷик дар қаҳрамонии ҷаҳон ба шумор меравад. Аввалин медалро дар ин мусобиқот Расул Боқиев соли 2007 дар шаҳри Рио-де-Жанейрои Бразилия ба даст овардааст. Вай дар вазни то 73 кило бо медали биринҷӣ сарфароз шуда буд.

Абдулмаҷид Кудиев моҳи октябри соли гузашта дар мусобиқаи қаҳрамонии ҷаҳон дар риштаи гуштии озод дар вазни то 70 кило дар шаҳри Тиранаи Албания медали биринҷӣ гирифт. Қаблан, Юсуф Абдусаломов соли 2007 дар қаҳрамонии ҷаҳон дар риштаи гуштии озод дар вазни то 84 кило дар шаҳри Бокуи Озарбойҷон соҳиби медали нуқра шуда буд.

Вале варзишгарони тоҷик соли 2024 натавонистанд дар қаҳрамонии ҷаҳон дар навъҳои олимпӣ медалҳои тиллою нуқра ба даст биёранд. Зимнан, пас аз пирӯзии гурзандози машҳури тоҷик Андрей Абдувалиев дар қаҳрамонии ҷаҳон соли 1995 дар шаҳри Ҳётеборги Шведсия, то ҳоло касе аз Тоҷикистон дар навъҳои олимпии варзиш медали тилло нагирифтааст.

Ҳамчунин баъди он ки гурзандоз Дилшод Назаров соли 2015 дар қаҳрамонии ҷаҳон дар Пекини Чин медали нуқра гирифт, варзишгарони тоҷик дар муддати қариб даҳ сол дар риштаҳои олимпӣ ба чунин натиҷа даст наёфтаанд.

Акмал Убайдов дар мусобиқаи қаҳрамонии бокси Осиё, ки аз 28-уми ноябр то 11-уми декабр дар шаҳри Чиангмайи Тайланд доир гардид, дар вазни то 60 кило мақоми аввалро касб намуд. Вай пас аз панҷ сол барои Тоҷикистон аз қаҳрамонии бокси Осиё медали тилло овард. Охирин маротиба Баҳодур Усмонов соли 2019 дар қаҳрамонии Осиё соҳиби медали тилло шуда буд.

Ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ дар соли 2024 дар як маросими ботантана, ки онро рӯзҳои наздик Кумитаи кор бо ҷавонон ва варзиши Тоҷикистон ташкил мекунад, супурда хоҳад шуд.

Як эътилофи мухолифи ҳукумати Тоҷикистон аз баёнияи 8 созмони байнулмилалии ҳуқуқи башар пуштибонӣ кардааст.

Ин созмонҳо рӯзи чоруми август марги чаҳор зодаи Вилояти Мухтори Кӯҳистони Бадахшонро дар зиндон маҳкум ва аз саркӯби идомадори фаъолони помирӣ ибрози нигаронӣ карданд.

Паймони миллии Тоҷикистон, ки фаъолияташ дар кишвар мамнуъст, рӯзи 18-уми август гуфт, “дар ҳамбастагӣ бо ҳашт созмони бонуфуз меистад ва нақзи фоҷиабори ҳуқуқи башар алайҳи мардуми Помирро маҳкум мекунад.”

“Мо бо шиддат талаби онҳоро барои гузарондани таҳқиқоти фарогир дар бораи ин ҷиноятҳои ваҳшатбор такрор намуда, пофишорӣ мекунем, ки гунаҳкорон бояд ба асоси қонунҳои байнулмилалӣ ҷавобгар шаванд,” – гуфта шудааст дар баёнияи Паймони миллӣ. Ин эътилоф аз се созмони мухолифи ҳукумати Тоҷикистон дар хориҷа иборат аст.

Ҳашт созмони байнулмилалӣ, аз ҷумла Созмони ҷаҳонии зидди шиканҷа ва Ҳамкорӣ барои ҳуқуқи башар рӯзи чоруми август аз ҳукумати Тоҷикистон хостанд, ки таъқиби пайваста ва шиканҷаи ҳадафмандонаи помириҳоро поён диҳад ва ба фаъолони зиндонӣ аз Бадахшон ёрии пизишкии муносиб расонад.

Онҳо ҳамзамон аз кишварҳои узви Созмони Милал, Иттиҳоди Аврупо ва фаъолони байнулмилалӣ даъват карданд, ки Тоҷикистонро барои раҳоии помириҳо водор намоянд.

• Монеъ шудан ба нақши раҳбарии Душанбе дар нишастҳои бахшида ба обу иқлим;
• Ҳимояи паноҳҷӯёни помирӣ;
• Оғози таҳримҳои ҳадафманд;
• Манъи сафари мансабдорони баландпояи тоҷик, ки дар саркӯби мунтазам даст доранд;
• Ҳамкорӣ бо Додгоҳи Байнулмилалии Ҷиноӣ дар пайванд ба шикояти пешниҳодшуда алайҳи ҳукумати Тоҷикистон ва барои ҷиноятҳои зидди башарият аз талабҳои дигари ҳомиёни ҳуқуқи башар аст. Ин шикоятро FFE, FUVI, ҲНИТ ва вакил Николас Линёл омода ва пешниҳод кардаанд.

Ихроҷи муҳоҷирони корӣ аз Русия дар соли 2025-ум наздик ба бист дарсад афзуда, дар ин муддат тахминан 800 кас аз шаҳрвандии Русия маҳрум гаштаанд.

Дафтари матбуоти Вазорати корҳои дохилии Русия ба хабаргузории “Интерфакс” гуфтааст, дар нимсолаи аввали соли равон беш аз ду ҳазору ҳаштсад хориҷӣ барои вайрон намудани қонунҳои Русия аз ин кишвар ронда шуданд.

Вазорати корҳои дохилии Русия афзудааст, ҳамчунон тақдими иҷозаи иқомати муваққатӣ беш аз 16 ҳазор ва тақдими иҷозати иқомати доимӣ зиёда аз 80 ҳазор маврид кам шуд.

Соли равон манъи вуруди хориҷиён ба Русия афзоиш ёфта, ба 385 ҳазор нафар баробар шудааст. Дар соли 2024-ум тахминан 301 ҳазор хориҷӣ аз вуруд ба Русия маҳрум шуданд ё онҳоро барои поймол намудани қонунҳои будубош аз ин кишвар берун карданд.

Радиои Озодӣ тақрибан ҳар рӯз дар бораи боздошт ё ихроҷи муҳоҷирони кории тоҷик аз Русия хабар мегирад. Теъдоди умумии онҳо маълум нест.

Додситонии кулли Тоҷикистон танҳо инро тасдиқ кардааст, ки дар соли 2024-ум зиёда аз 30 ҳазор муҳоҷири тоҷик аз Русия ронда шудаанд. Мақомот онро як пайомади ҳамла ба толори консертии “Крокус” дар наздикии Маскав донистанд. Дар ин ҳодиса чанд шаҳрванди Тоҷикистонро гумонзад медонанд ва муҳокимаи парвандаи онҳо идома дорад.

Мақомоти Русия мегӯянд, аксари муҳоҷиронро бо гуноҳи риоя накардани қоидаи будубош ё напардохтани молиёту надоштани ҳаққи кор аз ҳудуди ин кишвар берун кардаанд.

Муҳоҷирону ҳомиёни ҳуқуқ мақомоти Русияро барои поймоли ҳуқуқи коргарони хориҷӣ, фароҳам накардани шароити дурусти кору зиндагӣ ва фишору азият танқид мекунанд.

Embed ба дигарон фиристед

Ихроҷи муҳоҷирони корӣ аз Русия бештар шудааст

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:04 0:00

Русия шаби 18 ба 19-уми август бо 270 паҳподу панҷ мушаки дурпарвоз ва панҷ мушаки болдор ба минтақаҳои Украина зарба задааст.

Артиши Украина дар баёнияе гуфт, ки қисми зиёди ҳавопаймоҳои бесарнишин ва мушакҳоро сарнагун карданд, вале баъзе аз онҳо ба ҳадаф бархӯрданд. Аз ҷумла, як мушаки болдори Х-101 ва се мушаки болдори Искандар-М.

Дар вилояти Полтава, бахусус дар шаҳри Кременчук, интиқоли нерӯи барқ қатъ шудааст. Ба гуфтаи раиси маъмурияти низомии маҳаллӣ, Володимир Когут, беш аз якуним ҳазор нафар дар минтақа бе барқ монданд.

Зарбаи густурдаи артиши Русия пас аз гуфтушуниди раҳбарони Амрико, Украина ва баъзе аз кишварҳои аврупоӣ дар Вашингтон сурат гирифт.

Доналд Трамп, раисҷумҳури Амрико, баъд аз мулоқот омодагиро ба суҳбати сеҷонибаи ӯ, Владимир Зеленский, раисҷумҳури Украина ва Владимир Путин, президенти Русия эълон кард.

Ҷанги Русия дар Украина аз моҳи феврали соли 2022 идома дорад.

Ҳукумати Тоҷикистон минбаъд нархи ангиштро ҳам назорат хоҳад кард. Дар ин бора хабаргузории "Азия-Плюс" бо такя ба Хадамоти зиддиинҳисории Тоҷикистон хабар додааст.

Ба қавли манбаъ, ба номгӯи молу маҳсулоти аз лиҳози иҷтимои зарурӣ, ки нархи онҳо бояд аз ҷониби ҳукумат танзим шаванд, ангишт ҳам илова шуд.

Бар асоси ин тартиб, "агар дар давоми як моҳ нархҳо беасос ба андозаи 20 дарсад ва зиёда аз он боло бурда шаванд, Хадамоти зиддиинҳисорӣ сатҳи болоии арзиши молу маҳсулотро, ки дар рӯйхат зикр шудааст, ба давраи мушаххас (2-3 моҳ) муайян мекунад. Вале агар маълум шавад, ки чунин нархгузорӣ комилан асоснок аст, Хадамот ба он дахолат намекунад".

Ба рӯйхати маҳсулотҳое, ки нархашон дар ҳолати зарурӣ аз сӯи ҳукумат танзим мешавад, дар умум 16 номгӯйи мол, аз ҷумла орд, нон, сабзавот, равған, маҳсулоти ширӣ, гӯшт ва ғайра ворид шудааст.

Вале бо вуҷуди онки нархи чанде аз ин маҳсулотҳо дар гузашта якбора боло рафта буд, ҳукумат барои онҳо нархи ягона таъйин накард.

Танҳо дар бозорҳои давлатии Тоҷикистон барои баъзе маҳсулотҳо, аз ҷумла, гӯшт нарх таъйин шудааст, вале ба гуфтаи сокинон, ё риоя намешавад ва ё бо нархи расмӣ танҳо маҳсулоти камсифатро мефурӯшанд.

Вазири корҳои дохилии Эрон эълон кард, ки то охири соли ҳиҷрӣ-шамсӣ (20 марти соли 2026), 800 ҳазор тани дигар аз муҳоҷирони афғон аз ин кишвар ихроҷ хоҳанд шуд.

Искандар Муъминӣ рӯзи 18 август дар сафари худ ба шаҳри Машҳад гуфт, то кунун 1,2 миллион муҳоҷири афғон аз марзҳои Эрон хориҷ шудааст.

Ӯ афзуд, ки Эрон барномарезӣ кардааст, ки ду миллион муҳоҷири афғон аз ин кишвар ба Афғонистон баргандонида шавад.

Ба гуфтаи Искандар Муъминӣ, беш аз 70 дарсад аз як миллиону 200 ҳазор афғонҳои то кунун аз Эрон рафта, довталабон баргаштанд.

Вазири корҳои дохилии Эрон афзудааст, ки бозгашти онҳо "иззатмандона" анҷом хоҳад шуд ва ин амал, ба маънои "муҳоҷирситезӣ" нест.

Ин дар ҳоле аст, ки Эрон пас аз даргирӣ байни ин кишвар ва Исроил, ихроҷи муҳоҷирони афғонро шиддат бахшидааст.

Вазорати маориф ва илми Тоҷикистон бо пахши изҳороте гуфт, "дар дохили муассисаи таълимӣ хариду фурӯши либоси мактабӣ қатъиян манъ аст".

Изҳороти вазорат дар ҳоле нашр мешавад, ки шикояти волидайн аз маҷбур карданашон ба харидии либоси мактабӣ аз ҷойи муайян зиёд шудааст.

Дар баёнияи вазорат омадааст, ин ниҳод танҳо либосҳои тавсияшударо ба хонандагон пешниҳод карда, "дар раванди дӯхт, таъмин ва фурӯши либосҳои мактабӣ ва лавозимоти хониш иштирок надорад".

Намояндагони Вазорати маориф гуфтаанд, шаҳрвандон ҳақ доранд аз ҳар ҷойе хоҳанд барои фарзандонашон либоси мактабӣ бихаранд. Эълони вазорат дар ҳоле садо медиҳад, ки рӯзҳои ахир шикояти волидайн аз хариди либоси мактабӣ аз ширкатҳои алоҳида зиёд садо медиҳад.

Аз ҷумла, чанд сокини шаҳри Исфара ба Радиои Озодӣ шикоят карданд, ки муаллимон аз онҳо талаб кардаанд, ки барои фарзандонашон фақат аз як ширкати муайян либос харанд.

Дар санадҳое, ки волидайн ба Радиои Озодӣ фиристоданд, дида мешавад, ки барои ҳар хонанда бояд аз ширкати "Азиза Чоркӯҳ" либос харида ва санадшро бо мӯҳр ба мактаб пешниҳод кунанд.

Назари намояндагони ин ширкат ва мақомоти шаҳри Исфара маълум нест.

Мавзӯи фурӯши либоси хонандагон дар мактабҳо ва маҷбур кардани волидайн ба хариди либоси муайян чанд сол аст, ки садо медиҳад.

Мақомот дар гузашта гуфтанд, бо ҳадафи рушди саноат тавсия медиҳанд, ки сокинон барои фарзандонашон аз ширкатҳои ватанӣ либос харанд.

Вале мардум борҳо шикоят карданд, ки сифати либосҳои дӯхтаи ширкатҳои Тоҷикистон қонеъкунанда нест.

Раисҷумҳури Тоҷикистон гуфтааст, кишвараш “аз раванди мусолиматомези ҳалли буҳрони Украина ҷонибдорӣ мекунад”.

Изҳори назари Эмомалӣ Раҳмон рӯзи 18-уми август дар ҷараёни суҳбати телефониаш бо Владимир Путин, президенти Русия, садо додааст.

Ба навиштаи дафтари матбуоти президенти Тоҷикистон, Раҳмон гуфтугӯи ахири роҳбарони Амрико ва Русияро дар Аляска “барои коҳиши сатҳи ташаннуҷ ва таҳкими ҳамдигарфаҳмӣ дар арсаи байнулмилалӣ” муҳим хондааст.

Президенти Русия пеш аз гуфтугӯ бо Эмомалӣ Раҳмон, бо роҳбарони Беларус, Африқои Ҷанубӣ ва сарварони чанд кишвари дигар занг зада, натиҷаҳои музокиротро дар Аляска бо онҳо дар миён гузоштааст.

Доналд Трамп, раисҷумҳури Амрико ва ҳамтои русаш Владимир Путин 15-уми август дар Аляска вохӯрданд ва дар бораи роҳҳои хатми ҷанг дар Украина гап заданд. Аммо дар ин нишаст тавофуқ дар мавриди Украина ҳосил нашуд.

Дар ҳамлаи нерӯҳои Русия ба шаҳри Харкови Украина ҳафт кас кушта, дастикам бист нафар маҷруҳ шудаанд.

Иҳор Терехов, шаҳрдори Харков, рӯзи 18-уми август бо эълони рӯзи мотам гуфт, “дар миёни кушташудагон як духтари якунимсола ва як писари 16-сола ҳастанд.”

Яке аз маҷрӯҳон ҳамагӣ шаш сол доштааст.

Анна, сокини шаҳри Харков, ба бахши украинии Радиои Озодӣ гуфт, “садои таркишро шунидам ва ҳама чиз ба болоям афтод. Тирезаҳо канда шуда, ба болои фарзандам афтоданд."

Ҳавопаймоҳои бесарнишини Русия ба вилояти Одессаи Украина низ зарба задаанд, аммо дар бораи талафоти ҷонӣ гузорише нест.

Дар ҳамла ба шаҳри Запорожйе дастикам се кас кушта шудаанд.

Дар Русия мехоҳанд, фазои кориро барои муҳоҷирон, аз ҷумла шаҳрвандони Тоҷикистон тангтар кунанд.

Вазорати меҳнати Русия аз мақомоти ин кишвар хостааст, ки дар соли 2026 саҳми коргарони хориҷиро дар нуҳ соҳа, аз ҷумла бинокорӣ поин биоранд. Тибқи пешниҳоди вазорат, саҳми муҳоҷирон дар бинокорӣ ба панҷоҳ дарсад маҳдуд хоҳад шуд. Ин рақам дар соли 2025 то ҳаштод дарсад мерасид.

Ҳар сол садҳо ҳазор шаҳрванди Тоҷикистон дар ҷустуҷӯйи кору маоши муносиб ба Русия рафта, қисми асосии онҳо дар сохтмону бозор кор мекунанд.

Хабаргузории расмии "Интерфакс" рӯзи 15-уми август навишт, ки саҳми муҳоҷирони корӣ дар бахши сабзавоткорӣ, тиҷорати чӯбу тахта ва кор дар хоҷагии ҷангал на бештар аз чил дарсад пешбинӣ шудааст. Қаблан ин рақам то панҷоҳ дарсад буд.

Илова бар ин, пешниҳод шудааст, ки кори муҳоҷирон дар тиҷорати чаканаи шаробу тамоку маҳдуд ва саҳми онҳо дар ин бозор аз 15 дарсад то сифр поин оварда шавад.

Ин маҳдудиятҳо минтақаҳои Амуру Новосибирск, Оренбург, Самара, Твер, Челябинск ва гӯшаҳои дигари Русияро дар бар мегирад. Аз ҷумла, дар вилояти Амур кори муҳоҷирон истеҳсоли маводи хӯрокворӣ ва нӯшобаҳо, таъмири мошину таҷҳизот ва байторӣ пурра маҳдуд шудааст.

Дар ҳоле ки мақомоти Русия пешниҳоди охири худро тибқи қонун ва як роҳи ба танзим даровардани кори хориҷиён медонанд, бархе аз мунтақидон идомаи муҳоҷирситезӣ мепиндоранд. Раванде, ки дар якуним соли гузашта дар Русия авҷ гирифтааст.

Дар ним соли охир дар Русия зиёда аз 30 қонуни наве қабул шуд, ки маҳдудиятҳои зиёдеро барои муҳоҷирони корӣ ҷорӣ намуданд.

Embed ба дигарон фиристед

Пешниҳоди нав дар Русия дар бораи муҳоҷирони корӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:47 0:00

Теъдоди кушташудагон дар натиҷаи таркиш дар як корхонаи истеҳсоли борут дар Русия ба 14 нафар расидааст.

Вазорати ҳолатҳои фавқулодаи Русия рӯзи 18-уми август гуфт, ки дар маҳалли фалокат амалиёти наҷот ва бартарафсозии оқибатҳои он идома дорад.

Рӯзи 15-уми август дар корхонаи истеҳсоли борут бо номи “Эластик” дар вилояти Рязан таркиш шуд ва аввал гуфта мешуд, ки 11 нафар ба ҳалокат расидаанд.

Дар умум дар натиҷаи таркиш 149 нафар осеб дидаанд.

Сабаби ҳодиса ба гуфтаи мақомот, зоҳиран, риоя накардани қоидаҳои амниятӣ ҳангоми кор бо моддаҳои хатарноки тарканда будааст.

Кумитаи тафтишоти Русия дар ин замина парвандаи ҷиноӣ боз кардааст.

Умедҷон Солиев, яке аз гумонбарон дар парвандаи ҳамла ба "Крокус" қаблан дар Тоҷикистон ғоратгарӣ карда ва барои ҳамин дар Русия пинҳон шуда буд. Дар ин бора хабаргузории русии ТАСС бо такя ба маводҳои парванда хабар додааст.

Дар ҳоле, ки назари наздикони Умедҷон Солиев ба қазия маълум нест, ТАСС навиштааст ин ҷавон ҳанӯз соли 2023 дар Тоҷикистон даст ба ғоратгарӣ зада, баъдан ба Русия фирор кардааст. Радиои Озодӣ мустақилона ин маълумотро тасдиқ карда наметавонад.

Мақомоти Тоҷикистон дар бораи парванда нисбати Солиев чизе нагуфтаанд.

Умедҷон Солиев ҳамроҳ бо чор нафари дигар охири моҳи марти соли 2024 дар Ҷумҳурии Доғистони Русия боздошт шуданд. Мақомоти Русия ин афродро муттаҳам карданд, ки ба ҳамлагарон ба толори “Крокус” яроқ додаанд. Назари вакили дифои ин афрод ё наздиконаш ба иттиҳом маълум нашуд.

Аз 19 нафаре, ки дар доираи парвандаи ҳамла ба "Крокус" боздошт шудаанд, аксарашон шаҳрвандони Тоҷикистон ҳастанд. Мурофиаи ин афрод рӯзи 4-уми август дар яке аз додгоҳҳои шаҳри Маскав оғоз шуд. Дар ин миён даъватҳое садо дод, ки намояндагони Тоҷикистон бояд аз шаҳрвандони худ ҳимоят кунанд. Мақомоти Тоҷикистон гуфтанд, намояндагони кишвар дар мурофиаи гумонбарони ҳамла ба "Крокус" ширкат надоранд.

Шоми 17-уми август як мошини боркаш дар роҳи Душанбе-Хуҷанд ба дарё афтид ва ягона масир ба шимоли кишвар қариб ду соат баста шуд. Ҳодиса дар деҳаи Петеи ноҳияи Айнӣ рух додааст.

Ба гуфтаи шоҳидон, ду нафар дар дохили мошини боркаш буданд ва онҳоро то ҳол пайдо накардаанд.

Мақомот ҳодисаро шарҳ надодаанд.

Дар гузашта ҳам чандин маротиба мошинҳо дар роҳи Душанбе-Хуҷанд ба ҷарӣ ва дарё афтиданд. Ин масир ягона роҳи пулакӣ дар Тоҷикистон буда, нигоҳдории он ба зиммаи ширкати IRS аст. Ин ширкат барои кораш аз соҳибони мошинҳо маблағ мегирад. Молики IRS маълум нест.

Аксҳо аз ҷойи ҳодиса:

Телевизиони Fox News номаи Мелания Трамп, ҳамсари раиси ҷумҳури Амрикоро ба Владимир Путин нашр кард. Ин мактубро Доналд Трамп дар Аляска ба Путин дод.

Гузориш шудааст, ки Владимир Путин номаро дар ҳузури ҳайатҳои Русия ва Амрико боз карда хондааст.

Мелания Трамп дар ин нома навиштааст, "дар ҷаҳони муосир баъзе аз кӯдакон маҷбур мешаванд, ки хандаҳои ороми худро дар даруни худ бибанданд - як эътирози хомӯш бар зидди қувваҳое, ки онҳоро аз ояндаашон маҳрум месозад."

"Ҷаноби Путин шумо танҳо метавонед дар танҳоӣ ин хандаи онҳоро баргардонед. Бо ҳифзи ин кӯдакон шумо на танҳо ба Русия, балки ба башарият хидмате хоҳед кард. Чунин чизе фаротар аз тамоми тавофуқҳои инсонӣ аст ва шумо ҷаноби Путин метавонед имрӯз бо як ҳаракати қалам онро ба воқеият табдил диҳед. Замони он фаро расидааст," – навиштааст бонуи аввали Амрико.

Исроил ба фаластиниёни сокини Ғазза дастур додааст, ки ба ҷануби ин борика кӯч банданд. Ин тасмим рӯзи шанбеи 16-уми август ва пас он эълон шуд, ки Исроил аз густариши амалиёти низомӣ дар Ғазза хабар дод.

Ба гузориши артиши Исроил, кӯчондани хаймаҳои сокинон ба ҷануби Ғазза аз рӯзи якшанбеи 17-уми август оғоз мешавад.

Ҷузъиёти бештаре аз ин тарҳ ва амалиёти Исроил мушаххас нест. Исроил Катс, вазири дифои Исроил гуфт, кишвараш "дар ҳоли ниҳоӣ кардани тарҳи шикасти "Ҳамос" дар Ғазза аст."

"Ҳамос", ки аз сӯи Амрико ва Иттиҳоди Аврупо ба унвони гуруҳи террористӣ шинохта мешавад, наздик ба ду сол аст, ки дар Ғазза бо артиши Исроил даргир аст. Бо вуҷуди мухолифати Созмони милал ва бисёр кишварҳо ба густариши амалиёти Исроил ҳукумати ин кишвар тарҳи тасарруфи пурраи Навори Ғаззаро тасвиб кардааст.

Ҳукумати Тоҷикистон ба порлумон пешниҳод кардааст, ки барои рафтан ба назди фолбин ва ҷодугарҳо ва истифода аз кори онҳо ҷазо таъйин карда шавад. Радиои Озодӣ 17-уми август бо муҳтавои пешниҳоди ҳукумат шинос шуд.

Бар асоси ин санад, ба Кодекси ҳуқуқвайронкунии маъмурии Тоҷикистон банди нав бо номи "истифодабарӣ аз хизматрасонии сеҳрдон, ҷодугар ва фолбин" илова карда мешавад.

Дар сурати қабул шудани ин тағйирот аз сӯи порлумон, онҳое, ки ба наздик сеҳрдон, ҷодугар ва фолбин мераванд аз 5 то 10 нишондиҳанда барои ҳисобҳо ҷарима мешаванд. Як нишондиҳанда барои ҳисобҳо имсол 75 сомонӣ таъйин шудааст ва ҳар сол метавонад тағйир ёбад.

Мақомоти Тоҷикистон борҳо ба сокинон ҳушдор додаанд, ки аз рафтан ба назди фолбин ва ҷодугарҳо худдорӣ кунанд. Вазорати корҳои дохилии Тоҷикистон соли гузашта хабар дода буд, ки мизоҷони фолбинҳо ба шуъбаҳои ВКД даъват шуда, номашон дар махзанҳои алоҳида бо расмҳояшон гузошта мешавад.

Соли 2024 дар Тоҷикистон барои фолбинӣ ва соҳирӣ ҷазо таъйин шуда буд. Бино ба тағйирот ба моддаи 482-и Кодекси ҳуқуқвайронкунии маъмурии Тоҷикистон, барои машғул шудан ба фолбинӣ ва ҷодугарӣ нисбат ба шахсони воқеӣ ҷарима ба андозаи аз 80 то 100 нишондиҳанда барои ҳисобҳо ё ҳабси маъмурӣ ба мӯҳлати аз 10 то 15 шабонарӯз таъин карда мешавад.

Ҳамчунин, дар сурати такроран содир кардани ин кирдорҳо давоми як соли пас аз татбиқи ҷазои маъмурӣ, нисбат ба фолбинҳо парвандаи ҷиноятӣ оғоз карда мешавад. Онҳоро ҷарима ба андозаи аз ҳазору 500 то 2 ҳазор нишондиҳанда барои ҳисобҳо ё маҳрумият аз озодӣ ба мӯҳлати аз як то ду сол таҳдид мекунад.

Мақомоти Тоҷикистон давоми як соли ахир маъракаи мубориза бо фолбинон ва ҷодугаронро оғоз кардаанд. Вале пайвандони бархе аз ин боздоштшудаҳо гуфтанд, хешовандони онҳо ҷодугар ё фолбин набуданд, балки танҳо дуохонӣ мекарданд.

Тибқи иттилои ахири Вазорати корҳои дохилӣ, дар нимаи аввали соли равон "495 ҳолати машғул шудан ба сеҳру ҷоду ва фолбинӣ" сабт шудааст. Раёсати корҳои дохилии Душанбе мегӯяд, имсол танҳо дар пойтахти кишвар 90 кас барои фолбинӣ ва ҷодугарӣ ҷазо гирифтанд.